સંસ્કૃત ભાષા મારી દાદી છે.
અંગ્રેજી ભાષા પડોશમાં રહેતી
એક રૂપાળી નારી છે.
દિવાળીના દિવસે પડોશમાં રહેતી
રૂપાળી નારીને પગે
લાગી એકસો એક ડોલર લઈશ.
પણ ઉંઘ આવે ત્યારે
મારી માનું જ હાલરડું સાંભળીશ.
પેટમાં દુખે ત્યારે દાદીના
હાથે સૂંઠ-ઘી ખાઈ
મારું જીવન સાર્થક કરીશ.
ઓ હ્રદય, તેં પણ ભલા! કેવો ફસાવ્યો છે મને,
જે નથી મારા બન્યા , એનો બનાવ્યો છે મને ,
સાથ આપો કે ના આપો, એ ખુશી છે આપની ,
આપનો ઉપકાર , મારગ તો બતાવ્યો છે મને,
આ દુઃખ ના કાળમાં એને કરું છું યાદ હું,
મારા સુખના કાળમાં જેણે હસાવ્યો છે મને,
કૈં નહોતુ એ છતાં , સૌ એ મને લુંટી ગયા,
કૈં નહોતુ એટલે, મે પણ લુટાવ્યો છે મને ,
આમ તો હાલત અમારા બેય ની સરખી જ છે,
મે ગુમાવ્યા એમને, એણે ગુમાવ્યો છે મને,
એ બધા "બેફામ" જે આજે રડે છે મોત પર,
એ બધાએ જિંદગી આખી રડાવ્યો છે મને.
હૃદયને રસ્તે હું જન્મ્યો હતો, ખબર છે તને ?
રુદનને બદલે હું મલક્યો હતો, ખબર છે તને ?
હું તારી લટને કિનારે જ આવીને અટક્યો
ક્ષિતિજના ઢાળથી લપસ્યો હતો, ખબર છે તને ?
બિચારા ઈવ કે આદમને કંઈ ખબર ન્હોતી
પ્રણય મેં એમને શીખવ્યો હતો, ખબર છે તને ?
એ વર્ષોમાં તો રચાઈ નહોતી ભાષા છતાં,
હું બૂમ પાડીને બોલ્યો હતો, ખબર છે તને ?
સમયની શોધ થઈ તેની આગલી સાંજે
મેં ઇન્તજારને શોધ્યો હતો, ખબર છે તને ?
-મુકુલ ચોક્સી
